Skrevet av Ida Siem, Rauma SV

Valget nærmar seg. Snart veit vi svaret på kven som skal vere med å styre kommunen vår dei neste fire åra. Og det betyr mykje kven som styrer!

Kva får du om du gjer stemma di til SV?

Du får eit parti som sett fellesskapet høgt, og som vil ha eit varmt samfunn med gode, trygge og likeverdige tjenestar. SV vil vere nøysam og vedlikehalde for å få kommuneøkonomien i balanse. Du får eit parti som vil ha ei styrt reiselivsutvikling, og som jobbar framtidsretta for næringsliv og lokalsamfunn. SV veit at areal og natur er ein knapphetsressurs, og vi vil at tema som klima og bærekraft må få større plass. SV vil at kommunen skal vere ein attraktiv og trivelig arbeidsplass, og vi vil jobbe for at endå fleire skal ha Rauma som adresse.

Du får folkevalgte som har med seg viktige erfaringar frå fire år med heile sju representantar i posisjon. Du får ei sammensetning av kompetanse som er høgst relevant i møtet med alle dei tema og fag som står på sakslista til kommunestyret. Det er åpenbart ein fordel å kunne diskutere med ein arkitekt, lege, lærar, regnskapsførar, gardbrukar, bussjåfør, rektor, student, gründer eller daglig leiar når du i fellesskap skal finne fram til gode løsningar for samfunnsutvikling.

Du får ein ordførar som er ansvarlig, truverdig og diplomatisk. Ved å gje stemma di til SV og Yvonne Wold får du ein ordførar som er hardtarbeidande, og som har tatt styring i retning ein sunn kommuneøkonomi. Du får ein ordførar med solid politisk erfaring og med eit stort nettverk både lokalt og nasjonalt. Du får ein ordførar som held talar med nært innhold, og som skryt av alle andre enn seg sjølv. Du får ein ordførar som tenker på Rauma når ho står opp, og når ho legg seg – og som er motivert og målretta for fire nye år til det beste for kommunen vår.

Stem SV!