Kinosjef Marit Scheide er heilt over seg av begeistring over oppstarten for Åndalsnes kino etter ferien. Kinoen var stengt i tre og ei halv veke, men starta opp med brask og bram onsdagen etter Raumarock.
På ei veke har over 1.000 personar besøkt kinoen og no går vi inn i ei helg der Marit Scheide trur på nye fulle visingar. Ho veit at det har med særleg to ettertrakta filmar å gjere, men ho trur og at det har med ferieslutt og med lojalitet til den lokale kinoen å gjere.
– Eg frykta rett og slett at vi skulle misse mange fordi vi kom litt seint med Mamma Mia-filmen, men vi ser no at folk har prioritert å sjå filmen «heime». Mamma Mia blir sett opp fleire dagar også i neste veke, fortel Marit og legg til at Mission Impossible er den andre filmen som har gått for fulle hus og vil gjere det også ut i neste veke.
– Eg set opp nye visingar etter kvart som vi ser behovet, fortel kinosjefen. Ho ser svært lyst på hausten i og med at det heller ikkje er lenge til premiere på filmen Skjelvet som er ei oppfølging av filmen Bølgen.
– Er dette filmar som og vil toppe statistikken når året er omme?
– Det er for tidleg å seie, men ikkje umogleg. Vi låg litt etter fjorårstalet ved inngangen til sommaren, men no har vi dobla talet for august i høve til i fjor, fortel Marit.