Den sakna 20-åringen har tidlegare vore busett på Vigra ved Ålesund. No har han bustadsadresse i Rauma. Han var på veg til sin første tur med fabrikktrålaren "Langvin" av Ålesund. På veg nordover fekk han skyss med trålaren "K. Arctander" frå Stamsund. Ungdommen var med andre ord ikkje i arbeid då han vart meldt sakna. Til Sunnmørsposten si nettutgåve fortel Langvin-reiar Ole Edvartsen at då timar var gått natt til søndag utan at nokon hadde sett han – og han heller ikkje var på lugaren, vart det slege alarm. Båten vart gjennomsøkt utan resultat. "K. Arctander" gjekk straks i gang med søk i havet. Også Hovedredningssentralen i Nord-Norge sette inn alt dei hadde av ressursar. Tre kystvaktskip i tillegg til to helikopter ombord på to av skipa, deltok i leitinga. Men det ga ingen resultat. Då mørkret kom llokka 15.30 søndag, vart søka avslutta. I dag, måndag, har dei halde fram med søk frå eit Orion-fly. Politiinspektør Svein Sørmo ved Salten politidistrikt, seier til Smp-nett at det er lite håp om å finne 20-åringen i live. Båten han var om bord i, hadde forflytta seg rundt 30 kilometer frå da han var sett sist til han vart meldt sakna. Ikkje noko redningsutstyr er borte frå "K. Arctander". Dei antar han var kledd i T-skjorte og fritidsbukse. Det var i 01-tida natt til søndag at 20-åringen vart meldt sakna. Då var båten 125 natutiske mil sørvest for Bjørnøya. Det var fint ver i området, men vatnet heldt ein temperatur på rundt 7 grader. 20-åringen var på veg til sitt første opphald ombord i "Langvin", men har vore ombord i andre båtar tidlegare.