Skrevet av Janne Søvik, Rauma Arbeiderparti

Slik leksehjelpa i skulen er organisert i Rauma kommune er det kun elevar som bor i gangavstand til skulen, eller elevar som tilfeldigvis har føresette som har moglegheit til å hente barnet sitt midt på dag, som kan nyttiggjere seg av tilbodet. Dette er ikkje greitt.

Ifølge Opplæringslova §13-7a har alle elevar i grunnskolen rett til leksehjelp (det er ikkje krav til pedagog). Det er eit frivillig tilbod til elevar i barne- og ungdomsskule, men kommunen/skulen har ei plikt til å organisere eit tilbod etter visse krav.

Elevar har per i dag ikkje rett til skyss heim etter leksehjelp.

Intensjonen med Rauma Arbeiderparti sin interpellasjon i kommunestyret 25.05. 22, var å få svar på om det kan være mogleg for kommunen/skulane å organisere leksehjelp på ein slik måte at om ikkje alle, så kan fleire elevar enn i dag nytte seg av tilbodet. Då er ein avhengig av, slik vi ser det, at desse elevane får sitje på med bussane som køyrer eldre elevar heim litt seinare på dag. Dette var problemstillingane som vi ønska svar på, i forhold til skyss vart kommunen oppfordra til å drøfte problemstillinga med fylkeskommunen som er ansvarleg for ordinær skuleskyss.

Svaret frå kommunedirektøren kom i formannskapsmøtet i går 13.09.22, eller rettare sagt, det kom ikkje konkrete svar. Spørsmåla er derfor enda meir konkretisert og sendt inn på nytt til kommunedirektøren:

1. Kan elevar som brukar tilbodet om leksehjelp få sitje på med skulebussen som skyssar eldre elevar heim litt seinare på dag når det er kapasitet (plass på bussen)?

2. Kan den enkelte skule organisere leksehjelp annleis, eller på ein slik måte at elevar som vil bruke tilbodet om leksehjelp har moglegheit til å ta ein seinare skulebuss?

Eksempel 1: kan ein skule som organiserer leksehjelp til elevar i 3. og 4. klasse frå 12.30 - 13.15 , få sitte på med bussen som skyssar elevar i 5.,6. og 7. klasse heim 13.15, sjølv om obligatorisk skule er ferdig 12.30 og ordinær skyss i utgangspunktet går 12.30?

Eksempel 2: kan ein skule som tilbyr leksehjelp to gongar i veka frå 12.30 - 13.15 organisere det slik at leksehjelpa i staden blir tilbydt frå 12.30 - 14.10 ein gong i veka, slik at dei elevane kan å ta bussen som skyssar dei eldre elevane heim 14.10?

Vi veit at det er ledig kapasitet på dei aller fleste bussane, kanskje alle, og mange føresette villige til å betale bussbillett om det skulle være aktuelt. Det er vel logisk at bussane som har ledig kapasitet og køyrer same rute som tidlegare på dag lar yngre elvar få sitje på heim ein time eller to seinare på dag? Dette dreier seg om nokre få elevar og vil ikkje utgjere noko kostnad for kommune og fylkeskommune i Rauma. Her er det snakk om å være samarbeidsvillig, ekte og raus.

På lang sikt må målet nasjonalt være at retten til leksehjelp skal følgast opp med rett til skuleskyss. Skuleskyss må og utvidast til å gjelde SFO (skulefritidsordninga), men dette vil ta tid. I mellomtida må vi finne logiske og enkle løysningar til det beste for elevane.

Slik det er lagt opp i dag er den lovfesta retten til tilbod om leksehjelp urettferdig, men kan gjærast litt mindre urettferdig med enkel tilrettelegging frå kommune og fylkeskommune.